The Judgement

Secundus Malus
ffull darfe has bene oure deede / for thi commen is oure care;
This day to take oure mede / for nothyng may we spare.
Alas I harde that horne / that callys vs to the dome,
All that euer were borne / thider behofys theym com.
May nathere lande ne se / vs from this dome hide,
ffor ferde fayn wold, I fle / bot I must nedys abide;
Alas, I stande great aghe / to loke on that Iustyce,
Ther may no man of lagh / help with no quantyce.
vokettys ten or twelfe / may none help at this nede,
Bot ilk man for his self / shall answere for his dede.
Alas, that I was borne!
I se now me beforne,
That lord with Woundys fyfe;
how may I on hym loke,
That falsly hym forsoke,
When I led synfull lyfe?

Tercius Malus
Alas, carefull catyfys may we ryse,
sore may we wryng oure handys and wepe;
ffor cursid and sore covytyse
dampnyd be we in hell full depe.
Roght we neuer of godys seruyce,
his commaundementys wold we not kepe,
Bot oft tymes maide we sacrifice
to sathanas when othere can slepe.
Alas! now wakyns all oure were,
oure wykyd Warkys can we not hide,
Bot on oure bakys we must theym bere,
that will vs soroo on ilka syde.
Oure dedys this day will do vs dere,
Oure domysman here we must abide,
And feyndys, that will vs felly fere,
thare pray to haue vs for thare pride.
Brymly before vs be thai broght,
oure dedys that shall dam vs bidene;
That eyre has harde, or harte thoght,
that mowthe has spokyn, or ee sene,
That foote has gone, or hande wroght,
in any tyme that we may mene;
ffull dere this day now bees it boght.
alas! vnborne then had I bene!

Quartus Malus
Alas, I am forlorne! / a spytus blast here blawes!
I harde well bi yonde horne / I wote wherto it drawes;
I wold I were vnborne / alas! that this day dawes!
Now mon be dampnyd this morne / my warkys, my dedys, my sawes.
Now bees my curstnes kyd / alas! I may not layn
All that euer I dyd, / it bees put vp full playn.
That I wold, fayn were hyd, / my synfull wordys and vayn,
ffull new now mon be rekynyd / vp to me agayn.
Alas! fayn wold I fle / for dedys that I haue done,
Bot that may now not be / I must abyde my boyn;
I trowed neuer to have sene this dredfull day thus soyn;
Alas! what shall I say When he sittys in his trone?
To se his Woundys bledande / this is a dulfull case;
Alas! how shall I stand / or loke hym in the face?
So curtes I hym fand / that gaf me life so lang a space;
Mi care is all command, / alas! where was my grace?
Alas! catyffys vnkynde / where on was oure thoght?
Alas! where on was oure mynde / so wykyd warkys we Wroght?
To se how he Was pynde / how dere oure luf he boght,
Alas! we were full blynde / now ar we wars then noght.
Alas! my couetyse / myn yll will, and myn Ire!
Mi neghbur to dispise / most was my desyre;
I demyd euer at my deuyse / me thoght I had no peyre,
With my self sore may I grise / now am quyt my hyre.
Where I was wonte to go / and haue my Wordys at will,
Now am I set full thro / and fayn to hold, me still;
I went both to and fro / me thoght I did, neuer ill,
Mi neghburs for to slo / or hurt withoutten skill.
Wo worth euer the fader / that gate me to be borne!
That euer he lete me stir / bot that I had bene forlorne;
Warid be my moder / and warid be the morne
That I was borne of hir / alas, for shame and skorne!

Primus Angelus
stand not togeder, parte in two!
all sam shall ye not be in blys;
Oure lorde of heuen will it be so,
for many of you has done amys;
On his right hand ye good shall go,
the way till heuen he shall you wys;
ye wykid, saules ye weynd hym fro,
on his left hande as none of his.

Jesus
The tyme is commen, I will make ende,
my fader of heuen will it so be,
Therfor till erthe now will I weynde,
my self to sytt in maieste.
To dele my dome I will discende,
this body will I bere with me,
how it was dight mans mys to amende
all mans kynde ther shall it se.

Primus Demon
Oute, haro, out, out! / harkyn to this horne,
I was neuer in dowte / or now at this morne;
So sturdy a showte / sen that I was borne
hard I neuer here abowte / in ernyst ne in skorne,
A wonder!
I was bonde full fast
In yrens for to last,
Bot my bandys thai brast
And shoke all in sonder.

Secundus Demon
I shoterd and shoke / I herd sich a rerd,
When I harde it I qwote / for all that I lerd,
Bot to swere on a boke / I durst not aperd;
I durst not loke / for all medill-erd,
ffull payll;
Bot gyrned and gnast,
my force did, I frast,
Bot I wroght all wast,
It myght not auayll.

Primus Demon
It was like to a trumpe / it had sich a sownde;
I fell on a lumpe / for ferd that I swonde.

Secundus Demon
There I stode on my stumpe / I stakerd that stownde,
There chachid I the crumpe / yit held, I my grounde
halfe nome.

Primus Demon
Make redy oure gere,
we ar like to haue were,
ffor now dar I swere
That domysday is comme;
ffor all oure saules ar wente / and none ar in hell.

Secundus Demon
Bot we go we ar shente / let vs not dwell,
It sittys you to tente / in this mater to mell,
As a pere in a parlamente / what case so befell;
It is nedefull
That ye tente to youre awne,
What draght so be drawne,
If the courte be knawen
the Iuge is right dredfull.

Primus Demon
ffor to stand, thus tome / thou gars me grete.

Secundus Demon
let vs go to this dome / vp watlyn strete.

Primus Demon
I had leuer go to rome / yei thryse, on my fete,
Then forto grefe yonde grome / or with hym forto mete;
ffor wysely
he spekys on trete,
his paustee is grete,
bot begyn he to threte
he lokys full grisly.
Bot fast take oure rentals / hy, let vs go hence!
ffor as this fals / the great sentence.

Secundus Demon
Thai ar here in my dals / fast stand We to fence,
Agans thise dampnyd sauls / Without repentence,
And Iust.

Primus Demon
how so the gam crokys,
Examyn oure bokys.

Secundus Demon
here is a bag full, lokys,
of pride and of lust,
Of Wraggers and wrears / a bag full of brefes,
Of carpars and cryars / of mychers and thefes,
Of lurdans and lyars / that no man lefys,
Of flytars, of flyars / and renderars of reffys;
This can I,
Of alkyn astates
that go bi the gatys,
Of poore pride, that god hatys,
Twenty so many.

Primus Demon
peasse, I pray the, be still / I laghe that I kynke,
Is oght Ire in thi bill / and then shall thou drynke.

Secundus Demon
sir, so mekill ill will / that thai wold, synke
Thare foes in a fyere still / bot not all that I thynke
dar I say,
Bot before hym he prase hym,
behynde he mys-sase hym,
Thus dowbill he mase hym,
thus do thai today.

Primus Demon
has thou oght Writen there / of the femynyn gendere?

Secundus Demon
yei, mo then I may bere / of rolles forto render;
Thai ar sharp as a spere / if thai seme bot slender;
Thai ar euer in were / if thai be tender,
yll fetyld.
she that is most meke,
When she semys full seke,
she can rase vp a reke
if she be well nettyld.

Primus Demon
Thou art the best hyne / that euer cam beside vs.

Secundus Demon
yei, bot go we, master myne / yit wold I we hyde vs;
Thai haue blowen lang syne / thai will not abide vs;
We may lightly tyne / and then will ye chide vs
Togeder.

Primus Demon
Make redy oure tolys.
ffor we dele with no folys.

Secundus Demon
sir, all clerkys of oure scolys
ar bowne furth theder;
Bot, sir, I tell you before / had domysday oght tarid,
We must haue biggid, hell more / the warld is so warid.

Primus Demon
Now gett we dowbill store / of bodys myscarid,
To the soules where thai wore / both sam to be harrid.

Secundus Demon
Thise rolles
Ar of bakbytars,
And fals quest-dytars,
I had no help of writars
bot thise two dalles.
ffaithe and trowth, maffay / has no fete to stande;
The poore pepyll must pay / if oght be in hande,
The drede of god is away / and lawe out of lande.

Primus Demon
By that wist I that domysday / was nere hande
In seson.

Secundus Demon
Sir, it is saide in old sawes-
the longere that day dawes-
‘Wars pepill wars lawes.’

Primus Demon
I lagh at thi reson;
Alle this was token / domysday to drede;
ffull oft was it spokyn / full few take hede;
Bot now shall we be wrokyn / of thare falshede,
ffor now bese vnlokyn / many dern dede
In Ire;
All thare synnes shall be knawen,
Othere mens, then thare awne.

Secundus Demon
Bot if this draght be well drawen
don is in the myre.

Tutivillus
Whi spir ye not, sir / no questyons?
I am oone of youre ordir / and oone of youre sons;
I stande at my tristur / when othere men shones.

Primus Demon
Now thou art myn awne querestur / I wote where thou wonnes;
do tell me.

Tutivillus
I was youre chefe tollare,
And sithen courte rollar,
Now am I master lollar,
And of sich men I mell me.
I haue broght to youre hande / of saules, dar I say,
Mo than ten thowsand / in an howre of a day;
som at ayll-howse I fande / and som of ferray,
som cursid, som bande / som yei, som nay;
so many
Thus broght I on blure,
thus did I my cure.

Primus Demon
Thou art the best sawgeoure
that euer had I any.

Tutivillus
here a roll of ragman / of the rownde tabill,
Of breffes in my bag, man / of synnes dampnabill;
vnethes may I wag, man / for wery in youre stabill
Whils I set my stag, man. /

Secundus Demon
abide, ye ar abill
To take wage;
Thou can of cowrte thew,
Bot lay downe the dewe
ffor thou will be a shrew,
be thou com at age.

Tutivillus
here I be gesse / of many nyce hoket,
Of care and of curstnes / hethyng and hoket,
Gay gere and witles / his hode set on koket,
As prowde as pennyles / his slefe has no poket,
ffull redles;
With thare hemmyd shoyn,
All this must be done,
Bot syre is out at hye noyn
And his barnes bredeles.
A horne and a duch ax / his slefe must be flekyt,
A syde hede and a fare fax / his gowne must be spekytt,
Thus toke I youre tax / thus ar my bookys blekyt.

Primus Demon
Thou art best on thi wax / that euer was clekyt,
or knawen;
with wordes will thou fill vs,
bot tell thi name till vs.

Tutivillus
Mi name is tutiuillus,
my horne is blawen;
a ffragmina verborum / tutiullus colligit horum,
b Belzabub algorum / belial belium doliorum.

Secundus Demon
What, I se thou can of gramory / and som what of arte;
had I bot a penny / on the wold, I warte.

Tutivillus
Of femellys a quantite / here fynde I parte.

Primus Demon
Tutiuillus, let se / goddys forbot thou sparte!

Tutivillus
so Ioly
Ilka las in a lande
like a lady nerehande,
So fresh and so plesande,
makys men to foly.
If she be neuer so fowll a dowde / with hir kelles and hir pynnes,
The shrew hir self can shrowde / both hir chekys and hir chynnes;
she can make it full prowde / with iapes and with gynnes,
hir hede as hy as a clowde / bot no shame of hir synnes
Thai fele;
When she is thus paynt,
she makys it so quaynte,
She lookys like a saynt,
And wars then the deyle.
she is hornyd like a kowe / [...] fon syn,
The cuker hyngys so side now / furrid with a cat skyn,
All thise ar for you / thai ar commen of youre kyn.

Secundus Demon
Now, the best body art thou / that euer cam here in.

Tutivillus
An vsage,
swilk dar I vndertake,
makys theym breke thare wedlake,
And lif in syn for hir sake,
And breke thare awne spowsage.
yit a poynt haue I fon / I tell you before,
That fals swerars shall hider com / mo then a thowsand skore;
In sweryng thai grefe godys son / and pyne hym more and more,
Therfor mon thai with vs won / in hell for euer more.
I say thus,
That rasers of the fals tax,
And gederars of greyn wax,
Diabolus est mendax
Et pater eius.
yit a poynte of the new gett / to tell will I not blyn,
Of prankyd gownes & shulders vp set / mos & flokkys sewyd wyth in;
To vse sich gise thai will not let / thai say it is no syn,
Bot on sich pilus I me set / and clap thaym cheke and chyn,
no nay.
dauid in his sawtere says thus,
That to hell shall thai trus,
Cum suis adinuencionibus,
for onys and for ay.
yit of thise kyrkchaterars / here ar a menee,
Of barganars and okerars / and lufars of symonee,
Of runkers and rowners / god castys thaym out, trulee,
ffrom his temple all sich mysdoers / I cach thaym then to me
ffull soyn;
ffor writen I wote it is
In the gospell, withoutten mys,
Et eam fecistis
Speluncam latronum.
yit of the synnes seven / som thyng speciall
now nately to neven / that renys ouer all;
Thise laddys thai leven / as lordys riall,
At ee to be even / picturde in pall
As kyngys;
May he dug hym a doket,
A kodpese like a pokett,
hym thynke it no hoket
his tayll when he Wryngys.
his luddokkys thai lowke / like walk-mylne cloggys,
his hede is like a stowke / hurlyd as hoggys,
A woll blawen bowke / thise fryggys as froggys,
This Ielian Iowke / dryfys he no doggys
To felter;
Bot with youre yolow lokkys,
ffor all youre many mokkys,
ye shall clym on hell crokkys
With a halpeny heltere.
And nell With hir nyfyls / of crisp and of sylke,
Tent well youre twyfyls / youre nek abowte as mylke;
With youre bendys and youre bridyls / of sathan, the whilke
sir sathanas Idyls / you for tha ilke
This gill knaue;
It is open behynde,
before is it pynde,
Bewar of the West wynde
youre smok lest it wafe.
Of Ire and of enuy / fynde I herto,
Of couetyse and glotony / and many other mo;
Thai call and thai cry / go we now, go!
I dy nere for dry / and ther syt thai so
All nyght;
With hawvell and Iawvell,
syngyng of lawvell,
Thise ar howndys of hell,
That is thare right.
In slewthe then thai syn / goddys warkys thai not Wyrke;
To belke thai begyn / and spew that is irke;
his hede must be holdyn / ther in the myrke,
Then deffys hym with dyn / the bellys of the kyrke,
When thai clatter;
he wishys the clerke hanged,
ffor that he rang it,
Bot thar hym not lang it,
What commys ther after.
And ye Ianettys of the stewys / and lychoures on lofte,
youre baill now brewys / avowtrees full ofte,
youre gam now grewys / I shall you set softe,
youre sorow enewes / com to my crofte
All ye;
All harlottys and horres,
And bawdys that procures,
To bryng thaym to lures,
Welcom to my see!
ye lurdans and lyars / mychers and thefes,
fflytars and flyars / that all men reprefes,
Spolars, extorcyonars / Welcom, my lefes!
ffals Iurars and vsurars / to symony that clevys,
To tell;
hasardars and dysars,
ffals dedys forgars,
Slanderars, bakbytars,
All vnto hell.

Primus Demon
When I harde many swilke / many spytus and fell,
And few good of ilke / I had meruell,
I trowd it drew nere the prik. /

Secundus Demon
sir, a worde of counsell;
saules cam so thyk / now late vnto hell
As euer;
Oure porter at hell yate
Is haldyn so strate,
vp erly and downe late,
he rystys neuer.

Primus Demon
Thou art pereles of tho / that euer yit knew I,
when I Will may I go / if thou be by;
Go we now, We two. /

Secundus Demon
syr, I am redy.

Primus Demon
Take oure rolles also, / ye knawe the cause Why;
do com
And tent well this day.

Secundus Demon
sir, as well as I may.

Primus Demon
Qui vero mala
In ignem eternum.

Jesus
Ilka creatoure take tente
What bodworde I shall you bryng,
This wykyd warld, away is wente,
and I am commyn as crownyd kyng;
Mi fader of heuen has me downe sente,
to deme youre dedys and make endyng;
Commen is the day of Iugemente,
of sorrow may euery synfull syng.
The day is commen of catyfnes,
all those to care that ar vncleyn,
The day of batell and bitternes,
ffull long abiden has it beyn;
The day of drede to more and les,
of Ioy, of tremlyng, and of teyn,
Ilka wight that wikyd is
may say, alas this day is seyn!
here may ye se my Woundys wide
that I suffred for youre mysdede,
Thrugh harte, hede, fote, hande and syde,
not for my gilte bot for youre nede.
Behald, both bak, body, and syde,
how dere I boght youre broder-hede,
Thise bitter paynes I wold, abide,
to by you blys thus wold, I blede.
Mi body was skowrgid, withoutten skill,
also ther full throly was I thrett;
On crosse thai hang me on a hill,
blo and blody thus was I bett;
With crowne of thorne thrastyn full ill,
A spere vnto my harte thai sett;
Mi harte blode sparid thai not to spill.
man, for thi luf wold, I not lett.
The Iues spytt on me spitusly,
thai sparid, me no more then a thefe;
When thai me smote I stud, stilly,
agans thaym did I nokyns grefe.
Beholde, mankynde, this ilk am I,
that for the suffred sich myschefe,
Thus was I dight for thi foly,
man, loke thi luf was me full lefe.
Thus was I dight thi sorow to slake;
man, thus behovid the borud, to be;
In all my wo toke I no wrake,
my will it was for luf of the.
Man, for sorow aght the to qwake,
this dredfull day this sight to se;
All this suffred I for thi sake.
say, man, What suffred, thou for me?
Mi blissid barnes on my right hande,
youre dome this day thar ye not drede,
ffor all youre ioy is now commande,
youre life in likyng shall ye lede.
Commes to the kyngdom ay lastand,
That you is dight for youre good dede,
ffull blithe may ye be there ye stand,
ffor mekill in heuen bees youre mede.
When I was hungre ye me fed,
To slek my thrist ye war full fre;
When I was clothles ye me cled,
ye Wold, no sorowe on me se;
In hard, prison When I was sted,
On my penance ye had pyte;
ffull seke when I was broght in bed,
kyndly ye cam to comforth me.
When I was will and weriest
ye harberd me full esely,
ffull glad then were ye of youre gest,
Ye plenyd my pouerte full pitusly;
Belife ye broght me of the best,
And maide my bed there I shuld, ly,
Therfor in heuen shall be youre rest,
In ioy and blys to beld, me by.

Primus Bonus
lord, When had thou so mekill nede?
hungre or thrusty, how myght it be?

Secundus Bonus
When was oure harte fre the to feede?
In prison When myght We the se?

Tercius Bonus
When was thou seke, or wantyd wede?
To harbowre the when helpid we?

Quartus Bonus
When had thou nede of oure fordede?
when did we all this dede to the?

Jesus
Mi blissid barnes, I shall you say
what tyme this dede was to me done;
When any that nede had nyght or day,
Askyd you help and had it sone;
youre fre harte saide theym neuer nay,
Erly ne late, myd-day ne noyn,
As ofte-sithes as thai wold, pray,
Thai thurte bot aske and haue thare boyn.
ye cursid, catyfs of kames kyn,
That neuer me comforthid, in my care,
Now I and ye for euer shall twyn,
In doyll to dwell for euer mare;
youre bitter bayles shall neuer blyn
That ye shall thole when ye com thare,
Thus haue ye seruyd for youre syn,
ffor derfe dedys ye haue doyn are.
When I had myster of mete and drynke,
Catyfs, ye chaste me from youre yate;
when ye were set as syres on bynke
I stode ther oute wery and Wate,
yit none of you Wold, on me thynke,
To haue pite on my poore astate;
Therfor to hell I shall you synke,
Well ar ye worthy to go that gate.
When I was seke and soryest
ye viset me noght, for I was poore;
In prison fast when I was fest
wold, none of you loke how I foore;
When I wist neuer where to rest
With dyntys ye drofe me from youre doore,
Bot euer to pride then were ye prest,
Mi flesh, my bloode, ye oft for-swore.
Clothles, When that I was cold,
That nerehande for you yode I nakyd,
Mi myschefe sagh ye many folde,
Was none of you my sorowe slakyd;
Bot euer forsoke me, yong and olde,
Therfor shall ye now be forsakyd.

Primus Malus
lorde, when had thou, that all has,
hunger or thriste, sen thou god is?
When was that thou in prison was?
When was thou nakyd or harberles?

Secundus Malus
When myght we se the seke, alas!
and kyd the all this vnkyndnes?

Tercius Malus
When was we let the helples pas?
When dyd ye the this wikydnes?

Quartus Malus
Alas, for doyll this day!
alas, that euer I it abode!
Now am I dampned for ay,
this dome may I not avoyde.

Jesus
Catyfs, alas, ofte as it betyde
that nedefull oght askyd in my name,
ye harde thaym noght, youre eeres was hid,
youre help to thaym was not at hame;
To me was that vnkyndnes kyd,
therfor ye bere this bitter blame,
To the lest of myne when ye oght dyd,
to me ye dyd the self and same.
Mi chosyn childer, commes to me!
With me to dwell now shall ye weynde,
Ther ioy and blys euer shall be,
youre life in lykyng for to leynde.
ye warid Wightys, from me ye fle,
In hell to dwell withoutten ende!
Ther shall ye noght bot sorow se,
And sit bi sathanas the feynde.

Primus Demon
Do now furthe go, / trus, go we hyne!
vnto endles wo / ay-lastand pyne;
Nay, tary not so / we get ado syne.

Secundus Demon
hyte hyder warde, ho / harry ruskyne!
War oute!
The meyn shall ye nebyll,
And I shall syng the trebill,
A revant the devill
Till all this hole rowte.

Tutivillus
youre lyfes ar lorne / and commen is youre care;
ye may ban ye were borne / the bodes you bare,
And youre faders beforne / so cursid, ye ar.

Primus Demon
ye may wary the morne / and day that ye ware
Of youre moder
ffirst borne forto be,
ffor the wo ye mon dre.

Secundus Demon
Ilkone of you mon se
sorow of oder.
Where is the gold, and the good / that ye gederd togedir?
The mery menee that yode / hider and thedir?

Tutivillus
Gay gyrdyls, iaggid hode / prankyd gownes, whedir?
haue ye wit or ye wode / ye broght not hider
Bot sorowe,
And youre synnes in youre nekkys.

Primus Demon
I beshrew thaym that rekkys!
he comes to late that bekkys
youre bodyes to borow.

Secundus Demon
Sir, I Wold, cut thaym a skawte / and make theym be knawne;
Thay were sturdy and hawte / great boste haue thai blawne;
youre pride and youre pransawte / What will it gawne?
ye tolde ilk mans defawte / and forgate youre awne.

Tutivillus
moreouer
Thare neghburs thai demyd,
Thaym self as it semyd,
Bot now ar thai flemyd
ffrom sayntys to recouer.

Primus Demon
Thar neghburs thai towchid / With wordys full ill,
The warst ay thai sowchid / and had no skill.

Secundus Demon
The pennys thai powchid / and held, thaym still;
The negons thai mowchid / and had no will
ffor hart fare;
Bot riche and ill-dedy,
Gederand and gredy,
sore napand and nedy
youre godys forto spare.

Tutivillus
ffor all that ye spard / and dyd extorcyon,
ffor youre childer ye card / youre heyre and youre son,
Now is all in oureward / youre yeres ar ron,
It is commen in vowgard / youre dame malison,
To bynde it;
ye set bi no cursyng,
Ne no sich small thyng.

Primus Demon
No, bot prase at the partyng,
ffor now mon ye fynde it.
youre leyfys and youre females / ye brake youre wedlake;
Tell me now what it vales / all that mery lake?
se so falsly it falys. /

Secundus Demon
syr, I dar vndertake
Thai will tell no tales / bot se so thai quake
ffor moton;
he that to that gam gose,
Now namely on old, tose.

Tutivillus
Thou held, vp the lose,
That had I forgotten.

Primus Demon
sir, I trow thai be dom / somtyme were full melland;
Will ye se how thai glom. /

Secundus Demon
thou art ay telland;
Now shall thai haue rom / in pyk and tar euer dwelland,
Of thare sorow no some / bot ay to be yelland
In oure fostre.

Tutivillus
By youre lefe may We mefe you?

Primus Demon
showe furth, I shrew you!

Secundus Demon
yit to-nyght shall I shew you
A mese of ill ostre.

Tutivillus
Of thise cursid forsworne / and all that here leyndys,
Blaw, wolfys-hede and oute-horne / now namely my freyndys.

Primus Demon
Illa haill were ye borne / youre awne shame you sheyndys,
That shall ye fynde or to morne. /

Secundus Demon
com now with feyndys
To youre angre;
youre dedys you dam;
Com, go we now sam,
It is commen youre gam,
Com, tary no langer.

Primus Bonus
We loue the, lorde, in alkyn thyng,
That for thyne awne has ordand thus,
That we may haue now oure dwellyng
In heuen blis giffen vnto vs.
Therfor full boldly may we syng
On oure way as we trus;
Make we all myrth and louyng
With te deum laudamus.