The Prophets

Moyses
Prophetam excitabit deus de fratribus vestris;
Omnis anima, que non audierit prophetam illum,
exterminabitur de populo suo;
Nemo propheta sine honore nisi in patria sua.
All ye folk of israell,
herkyn to me! I will you tell
Tythyngis farly goode;
All wote ys how it be fell
wherfor Adam was dampnyd, to hell,
he, and all his blode.
Therfor will god, styr and rayse
A prophete, in som man dayes,
Of oure brethere kyn;
And all trowes as he says,
And will walk in his ways,
ffrom hell he will theym twyn.
when his tyme begynnys to day,
I rede no man fro hym dray,
In way, ne stand on strut;
ffor he that will not here his sagh,
he be shewed, as an out-lagh,
And from his folkis be putt.
I warne you well that same prophete
shall com hereafterward, full swete,
And many meruels shew;
Man shall fall till his feete,
ffor cause he can bales beete,
Thrugh his awn thew.
All that will in trowth ren
shall he saue, I warne you then,
Trust shall his name be.
Bot all ouer will man prophete ken
with worship, amangis men,
Bot in his awne countre.
herkyns all, both yong and old,!
God that has all in wold,
Gretys you bi me;
his commaundementis ar ten;
Behold, ye that ar his men,
here ye may theym se.
his commaundementis that I haue broght,
looke that ye hold, thaym noght
ffor tryfyls, ne for fables;
ffor ye shall well vnderstand,
That god wrote theym with his hand,
In thyse same tables.
Ye that thyse in hart will hald,
vnto heuen shall ye be cald,
That is fyrst to com;
And ye that will not do so,
Till hell pyne mon ye go,
And byde a bytter dome.
Do now as I shall you wys;
The fyrst commaundement is this
That I shall you say;
Make no god of stok ne stone,
And, trow in none god, bot oone,
That mayde both nyght and day.
Anothere bydis thou shall not swere,
ffor no mede, ne for no dere,
ffalsly, bi godis name;
If thou swere wrongwosly,
Wit thou well and wytterly,
Thou art worthi grete blame.
The thyrd, is, thou shall well yheme
Thi holy day, and serue to wheme
God with all thi hart.
The fourt commaundement is bi tayll,
ffader and moder worship thou shall,
In pouert and in qwarte.
The fyft commaundis thou shall forsake
ffornycacyon, and take the a make,
And lyf in rightwys state.
The sext commaundis thou shal not be
Man sloer, for gold, ne fee,
Ne for luf, ne for hate.
The seuenth commaundis that thou shall leue,
And nather go to stele ne reue,
ffor more then for les.
The aght bydis both old, and yong,
That thay be traw of thare tong,
And bere no fals witnes.
The nenth bydis the, bi thi lif,
Thou desyre not thi neghbur’s wife,
Ne mayden that is his.
The tent bidis the, for no case,
Desyre not wranwosly thyng thi neghbur has;
Do thus, and do no mys.
I am the same man that god chase,
And toke the ten commaundementis of peasse
In the monte synay;
Thise wordis, I say, ar no les;
My name is callyd moyses;
And haue now all good day!
David
a Omnes reges adorabunt eum, omnes gentes seruient ei.
herkyn, all, that here may,
And perceyf well what I shall say,
All with righ[t]wisnes.
loke ye put it not away,
Bot thynk theron both nyght and day,
ffor it is sothfastnes.
Iesse son, ye wote I am;
Dauid is my right name,
And I bere crowne;
Bot ye me trow, ye ar to blame;
Of Israel, both wyld, and tame,
I haue in my bondon.
As god of heuen has gyffyn me wit,
shall I now syng you a fytt,
With my mynstrelsy;
loke ye do it well in wrytt,
And theron a knot knytt,
ffor it is prophecy.
Myrth I make till all men,
with my harp and fyngers ten,
And warn theym that thay glad,
ffor god will that his son down send,
That wroght adam with his hend,
And heuen and erth mayde.
He will lyght fro heuen towre,
ffor to be mans saueyoure,
And saue that is forlorne;
ffor that I harp, and myrth make,
Is for he will manhede take,
I tell you thus beforne;
And thider shall he ren agane,
As gyant of mych mayne,
Vnto the hyest sete;
Ther is nawther kyng, ne swayn,
Then no thyng that may hym layn,
Ne hyde from his hete.
he shall be lord, and kyng of all,
Tyll hys feete shall kyngis fall,
To offre to hym wytterly.
Blyssyd, be that swete blome,
That shall saue vs at his com!
Ioyfull may we be.
Riche gyftis thay shall hym bryng,
And till hym make offeryng,
kneland on thare kne;
well were hym that that lordyng,
And that dere derlyng,
Myght bide on lyfe and se.
Men may know hym bi his marke,
Myrth and lovyng is his warke,
that shall he luf most.
lyght shall be born that tyme in darke,
Both to lawd, man and to clark,
the luf of rightwys gost.
Therfor, both emperoure and kyng,
Ryche and poore, both old, and ying,
temper well youre gle,
Agans that kyng lyght downe,
ffor to lowse vs of pryson,
And make vs all free.
Thou shew thi mercy, lord, tyll vs,
ffor to thou com, to hell we trus,
we may not go beside;
lord, when thi will is for to dele
Tyll us thi salue and thi hele,
whom we all abyde.
Now haue I songen you a fytt;
loke in mynd that ye haue it,
I rede with my myght;
he that maide vs all with his wytt,
sheld, vs all from hell pytt,
And graunt vs heuen lyght!
Sybilla Propheta
Iudicii signum tellus sudore madescit,
E celo rex adueniet per secla futurus,
Scilicet in carne presens vt iudicet orbem.
Who so wyll here tythyngis glad,
of hym that all this warld, made,
here me wytterly!
sibill sage is my name;
Bot ye me here, ye ar to blame,
My word, is prophecy.
All men was slayn thrugh adam syn,
And put to pyne that neuer shall blyn,
thrugh falsnes of the feynd.
A new kyng comes from heuen to fyght
Agans the feynd, to wyn his right,
so is his mercy heynd.
All the warld, shall he deme,
And that haue seruyd hym to wheme,
Myrth thaym mon betyde;
All shall se hym with thare ee,
Ryche and poore, low and hye,
No man may hym hyde;
Bot thay shall in thare flesh ryse,
That euery man shall whake and gryse,
Agans that ilk dome.
with his santis, many oone,
he shall be sene in flesh and, bone,
that kyng that is to com.
All that shall stand hym before,
All shal be les and more,
Of oone eld, ichon.
Angels shall qwake then for ferd,
And fyre shall bren this mydyll-erd,
yei, erth and, all ther apon.
shall nothyng here in erth be kend,
Bot it shall be strewyd, and brend,
All waters and the see.
sythen shall both hill and dale
Ryn togeder, grete and smale,
And all shall euen be.
At hys commyng shall bemys blaw,
That men may his commyng knaw;
ffull sorowfull shall be that blast;
Ther is no man that herys it,
Bot he shall qwake for all his witt,
Be he neuer so stedfast.
Then shall hell gape and gryn,
That men may know thare dome therin,
Of that hye iustyce;
That ill have done, to hell mon go;
And to heuen the other also,
that has been rightwys.
Therfor, I rede ilk a man,
kepe, as well as he can,
ffro syn and fro mysdede.
My prophecy now haue I told;
God, you saue, both yong and old,
And help you at youre nede!
Daniel
Cum venerit sanctus sanctorum cessabit vncio vestra.
God that maide adam and eue,
whils thay dyd well, he gaf thaym leue
In paradise to dwell;
Sone when thay that appyll ete,
Thay were dampned, sone and skete,
Vnto the pyne of hell,
Thrugh sorow and paynes euer new;
Therfor wyll god apon vs rew,
And his son downe send,
Into erth, flesh to take,
That is all for oure sake,
oure trespas to amend.
fflesh with fleshe will be boght,
That he lose not that he has wroght
wyth hys awne hend.
Of a madyn shal he be borne,
To saue all that ar forlorne,
Euermore withoutten end.


2022 Jan 21  20:05:23